بەلگىلى زاڭگەر ايگۇل ورىنبەك ءوزىنىڭ facebook-تاعى پاراقشاسىندا اۋرۋحانادا جۇمىس ىستەپ جۇرگەن ۆولونتەرلەردىڭ دەنساۋلىق ساقتاۋ ءمينيسترى الەكسەي سويعا جولداعان بەينەۇندەۋىن جاريالادى.

"ناۋقاستارعا جاقىندارى اكەلگەن زاتتاردى جەتكىزۋمەن اينالىسامىز" دەگەن ەرىكتىلەر اۋرۋحانالار دارى-دارمەكپەن قامتاماسىز ەتىلگەنى تۋرالى دەرەك جالعان ەكەنىن، وعان وزدەرى كۇنبە-كۇن كۋا بولىپ جۇرگەنىن، ونى ايعاقتايتىن ۆيدەوماتەريالدىڭ جەتكىلىكتى ەكەنىن جەتكىزدى.

ولار مينيستردەن "قاجەتتى جاعداي جاسالىپ جاتىر" دەپ ايتپاۋىن ءوتىندى. سوزدەرىنشە، وزگە ەلدەردەن كەلىپ جاتقان گۋمانيتارلىق كومەك اۋرۋحانالارعا جەتىپ جاتقان جوق.

ەرىكتىلەر مينيستر جاقىن ارادا ءتيىستى شارا قابىلداماسا، بولىمدەگى جاعداي تۋرالى ۆيدەونى جەلىگە جۇكتەيتىنىن ايتتى. ولار ستاسيونارلاردا قاجەتتى دارى-دارمەك جەتكىلىكتى بولعاندا، ءدارىحانالاردا ۇزىن-سونار كەزەك بولماس ەدى دەپ سانايدى.

– كەزەكتە تۇرعاندار ىندەت جۇقتىرىپ جاتىر. جۇيكەلەرى توزعان. حالىق ءدارى ىزدەپ قالادا سابىلىپ ءجۇر. سۇرانىستىڭ كوپتىگىنەن بۇرىن 300 تەڭگە تۇرعان تابلەتكالار ءقازىر 25 مىڭ تەڭگەگە شارىقتاپ كەتتى. شارا قولدانىڭىز، قولدانا المايسىز با، وندا ورنىڭىزعا ماسەلەنى شەشەتىن باسقا ادام كەلسىن. حالىقتى مازاق ەتكەندى دوعارىڭىز، – دەدى ەرىكتىنىڭ ءبىرى.

كەلەسى ۆولونتەر ەلدەگى وسى جاعدايدى پايدالاناتىن الىپ-ساتارلار بايىپ قالۋدى كوزدەپ وتىرعانىن ايتتى. ول مۇندايمەن اينالىسىپ جۇرگەن ادامداردى تىزىمدەپ، ءارقايسىسىن كورسەتۋ كەرەك دەگەن پىكىردە.

– بۇگىن عانا ماسكەۋدەن گۋمانيتارلىق كومەك كەلگەنىن كورىپ وتىرمىز. ءبىز وسى دارىلەردىڭ اۋرۋحاناعا، ناۋقاستارعا جەتۋىن قاداعالايمىز. ءار پالاتانى ارالاپ، ۆيدەورەپورتاج تۇسىرەمىز. ەگەر ازاماتتارىمىز ءدارى تاپشىلىعىنان اجال قۇشاتىن بولسا، ورىندارىڭىزدى بوساتىڭىزدار! ءبىز قازاقستاندىقتاردىڭ قىرىلعانىنا جول بەرمەيمىز. ولاردىڭ اقشاسى، جۇمىسى، ەندى مىنە، دەنساۋلىعى دا جوق. وسى كۇيگە  قالاي تۇستىك... حالىق قىرىلىپ جاتقاندا، مىڭداعان شارشى مەترلىك رەستورانداردىڭ كەرەگى قانشا؟ ەرتەڭ ادامدار قايتىس بولسا، ول رەستورانعا كىم بارادى؟ باسقا پلانەتادان اكەلەسىزدەر مە؟! دەرەۋ شارا قولدانىڭىزدار. ستاسيونارلاردى قاراپايىم قاجەتتىلىكتەرمەن، سۋمەن، قىمىزبەن، ءنارلى تاماقپەن قامتاماسىز ەتىڭىزدەر. بۇل سونداي قيىن با؟ ءبىز جىلدار بويى ەشنارسە سۇراماي كەلدىك. ەندى ناۋقاستاردى، مەديسينا ماماندارىن قولداۋدى سۇراپ تۇرمىز، –  دەدى كەلەسى ەرىكتى.

"بۇل – گەنوسيد. ءبىز بارشا قازاقستان حالقى گەنوسيدكە قارسىمىز" دەگەن ەرىكتىلەر دەنساۋلىق ساقتاۋ مينيسترلىگى جىلدار بويى مەدبيكەلەر شاعىمدانا المايتىنداي جۇيە قۇرىپ كەلگەنىن جەتكىزدى.

– شۇعىل شارا قابىلداڭىز! قابىلداماساڭىز، ءبىز قولدا بار بارلىق ۆيدەونى جاريالايمىز. بۇل – "بومبا" بولادى. مەدبيكەلەردى مازاق ەتۋ دوعارىلسىن!، – دەدى ەرىكتىلەر ۆيدەو سوڭىندا.